ព្រះត្រៃបិដក ភាគ ៥០
ភិក្ខុនោះ ឃើញរូបដោយចក្ខុ រមែងមិនកាន់យកនូវនិមិត្ត មិនកាន់យកនូវអនុព្យញ្ជនៈ អកុសលធម៌ដ៏លាមកទាំងឡាយ គឺអភិជ្ឈា និងទោមនស្ស គប្បីជាប់តាមនូវបុគ្គល ដែលជាអ្នកមិនសង្រួមនូវឥន្រ្ទិយ គឺចក្ខុណា ភិក្ខុនោះ ក៏ប្រតិបត្តិ ដើម្បីសង្រួមនូវឥន្រ្ទិយ គឺចក្ខុនោះ រក្សាឥន្រ្ទិយ គឺចក្ខុ ដល់នូវការសង្រួម ក្នុងឥន្រ្ទិយ គឺចក្ខុ។ ឮសំឡេងដោយត្រចៀក ... ធុំក្លិនដោយច្រមុះ... លិទ្ធរសដោយអណ្តាត... ពាល់ត្រូវផោដ្ឋព្វៈ ដោយកាយ... ដឹងច្បាស់ធម្មារម្មណ៍ដោយចិត្ត មិនកាន់យកនូវនិមិត្ត មិនកាន់យកនូវអនុព្យញ្ជនៈ អកុសលធម៌ដ៏លាមកទាំងឡាយ គឺអភិជ្ឈា និងទោមនស្ស គប្បីជាប់តាមនូវបុគ្គលដែលជាអ្នកមិនសង្រួមនូវឥន្រ្ទិយ គឺចិត្តណា ភិក្ខុនោះ ក៏ប្រតិបត្តិ ដើម្បីសង្រួមនូវឥន្រ្ទិយ គឺចិត្តនោះ រក្សាឥន្រ្ទិយ គឺចិត្ត ដល់នូវការសង្រួមក្នុងឥន្រ្ទិយ គឺចិត្ត។ ភិក្ខុនោះ ប្រកបដោយសេចក្តីសង្រួមនូវឥន្រ្ទិយដ៏ប្រសើរនេះហើយ ទើបទទួលនូវសេចក្តីសុខ ដែលមិនច្រឡំដោយកិលេសក្នុងសន្តាន។
ID: 636855481369602422
ទៅកាន់ទំព័រ៖